मंडळी, तुम्ही अनेक जणांची फ्लॅट घेताना किंवा फ्लॅट घेतल्यानंतर फसवणूक झाल्याचं ऐकलंचं असेल. अशा घटना आपल्या आजूबाजूच्या परिसरात वारंवार घडत असतात. फ्लॅट खरेदी केल्यानंतर आपले लाखो रुपये बुडाले असं लक्षात येतं. पण तो पर्यंत खूप उशीर झालेला असतो. जर ही गोष्ट अगोदर लक्षात आली असती तर लाखो रुपयांना चुना लागला नसता असं नंतर लक्षात येतं. पण आता बिनधास्त राहा, कारण या बातमीत आपण खूपच महत्त्वाच्या विषयावर बोट ठेवलं आहे, त्यामुळे फ्लॅट घेण्याआधी तुम्ही नेमकं काय केलं पाहिजे? जेणेकरून तुम्हाला नंतर पश्चाताप होणार नाही. चला या बातमी सविस्तर जाणून घेऊया. (Seven things nobody tells you before buying a flat)..
फ्लॅट खरेदी करणे म्हणजे आयुष्यातला सर्वात मोठ्या व्यवहारांपैकी एक व्यवहार समाजाला जातो, त्यामुळे असा व्यवहार करत असताना ताबडतोब निर्णय घेणं धोक्याचं ठरतं. म्हणून आम्ही या ठिकाणी फ्लॅट घेण्याआधी 7 महत्त्वाच्या गोष्टी पाहिल्या आहेत, ज्या तुम्हाला लाखो रुपयांचे नुकसान होण्यापासून वाचवू शकतात. पहिली सर्वात महत्त्वाची गोष्ट म्हणजे;
(1) स्थानिकांशी बोला:
ज्या भागात तुम्हाला फ्लॅट घ्यायचा आहे तिथल्या स्थानिकांशी किंवा त्या भागात असलेल्या आपल्या नातेवाईक मित्रांशी बोला. असे केल्याने त्या भागाची खरीखुरी पार्श्वभूमी तुम्हाला समजून येईल. त्या ठिकाणचा वॉटर सप्लाय, ट्रॅफिक, सुरक्षितता, बिल्डरचा रेकॉर्ड, आणि भविष्यकाळात त्या परिसराचा होणारा विकास, हे तुम्हाला तिथले स्थानिक लोकचं सांगू शकतात. त्यामुळे फ्लॅट घेण्याआधी स्थानिकांशी बोलणे खूपच महत्त्वाचे आहे.
(2) मित्रांचा सल्ला घ्या:
ज्या मित्रांनी आधीच फ्लॅट घेतला आहे अशा मित्रांचा अनुभव आपल्याला फ्लॅट घेताना खूप मदत करू शकतो. त्यांच्या अनुभवातून तुम्हाला बरंच काही शिकायला मिळतं. कधी कधी असं होतं की त्यांच्या कॉन्टॅक्ट मधून तुम्हाला चांगले डील्स, विश्वसनीय एजंट्स किंवा डेव्हलपर्स मिळून जातात. त्यामुळे ज्या मित्राने फ्लॅट खरेदी केला आहे अशा मित्राचा सल्ला घ्यायला विसरू नका.
(3) ग्रुपमध्ये बुकिंग करा:
जर तुम्ही 2-3 मित्र किंवा नातेवाईक मिळून एकाच प्रोजेक्टमध्ये फ्लॅट बुकिंग केल्यास तुम्हाला डेव्हलपरकडून विशेष सवलती मिळू शकतात. अनेकदा तर फर्निचर पॅकेज, फ्री रजिस्ट्रेशन किंवा इतर सुविधा देखील तुम्हाला मिळू शकतात.
(4) व्यवहारात एजंट टाळा:
फ्लॅट खरेदीच्या व्यवहारात एजंटची मदत घेऊ नका. शक्य असेल तर थेट डेव्हलपरकडून व्यवहार करा. यामुळे एजंटला द्यावा लागणारा 5-7% पर्यंतचा कमिशन वाचतो आणि घर स्वस्तात(affordable flats) मिळण्याची शक्यता वाढते.
(5) सणासुदीच्या ऑफर्सचा फायदा मिळवा:
नेहमीच दसरा, दिवाळी, गुढीपाडवा अशा सणांमध्ये डेव्हलपर्स स्पेशल डिस्काउंट्स देत असतात. तसेच फ्री अ‍ॅमेनीटीज किंवा इतर फायदे देखील देतात. या काळात घर बुक (Flat Booking) केल्यास तुमचा मोठा फायदा होऊ शकतो.
(6) कायदेशीर कागदपत्रांची तपासणी:
कोणत्याही प्रोजेक्टमध्ये घर बुक करण्याआधी सर्व कायदेशीर कागदपत्रांची बारकाईने तपासणी करणे अत्यंत आवश्यक आहे. सर्वात अगोदर, RERA (Real Estate Regulatory Authority) नोंदणी क्रमांक तपासून घ्यावा. RERA नोंदणी असल्यास प्रोजेक्ट कायदेशीर असून ग्राहकांच्या हक्कांचे संरक्षण केले जाते. त्यानंतर BMC किंवा स्थानिक प्राधिकरणाकडून मिळालेली परवानगी, जसे की बिल्डिंग प्लॅन मंजुरी, एनओसी (No Objection Certificate), आणि पर्यावरण परवानग्या हे सर्व तपासले पाहिजेत.
तसेच, प्रोजेक्ट ज्या जमिनीवर बांधला जात आहे त्याचे जमीन टायटल क्लिअर असल्याची खात्री करावी, म्हणजेच ती जमीन बिल्डरच्या मालकीची आहे की नाही आणि त्यावर कोणताही कायदेशीर वाद किंवा बंधन नाही याची तपासणी केली पाहिजे. याशिवाय, प्रकल्पाचे काम पूर्ण झाल्यानंतर मिळणारे कमलेशन सर्टिफिकेट (Occupation Certificate) देखील महत्वाचे असते, कारण त्याशिवाय सदनिकेत राहणे कायदेशीर मानले जात नाही. त्यामुळे या सर्व कागदपत्रांची सखोल तपासणी करण्यासाठी तज्ञ व अनुभवी लोकांचा सल्ला घ्यावा.
(7) शक्य असल्यास रोख पेमेंट करा:
घर खरेदी करताना शक्य असेल तर रोख रक्कम (Cash payment) भरा. बिल्डर किंवा डेव्हलपरला संपूर्ण किंवा जास्तीत जास्त रक्कम एकत्र मिळाल्यास त्यांचा कॅश फ्लो सुधारतो, ज्यामुळे ते कधी कधी ग्राहकांना विशेष सवलत देऊ शकतात किंवा किंमत थोडी कमी करतात. अशा सौद्यांमध्ये बाजारभावापेक्षा कमी किंमतीत घर मिळण्याची शक्यता वाढते.
मात्र, हा निर्णय घेण्याआधी काही गोष्टी लक्षात घेणे गरजेचे आहे. सर्वप्रथम, पेमेंट पद्धती पूर्णपणे कायदेशीर आणि पारदर्शक असावी. कोणत्याही प्रकारचा “ब्लॅक मनी” व्यवहार टाळा, कारण अशा व्यवहारांवर कायद्याने बंदी घालण्यात आलेली असून त्याचे गंभीर परिणाम होऊ शकतात. तसेच, मोठी रक्कम एकत्र देताना त्या व्यवहारावर GST, स्टॅम्प ड्युटी, रजिस्ट्रेशन शुल्क, TDS (Tax Deducted at Source) यांसारख्या करदायित्वांची माहिती असणे आवश्यक आहे.
